فمان الله يا أغلى ماسكن قلبي فمان الله
فمان الله من شخص أظنك صعب تنسينه
فمان الله يا أول حب عاشه "أكرم"بدنياه
يعرفك زين وانتي يابعد عمره تعرفينه
أجل يومه طفل من غيرك اللي ضمه ورباه
أجل من تعبك ليما كبر وانتي تربينه
أجل من قال:خل نفسك عزيزه والهوان اجفاه
توصينه إلى من صاب,واليا اخطا تعذرينه
أجل.يامحبوبة.من غيرك خذا بيده ومن خلاه
يكافح لين يلمس أبعد النجمات بيدينه
أجل من شجعه يومه قصد غيرك وقال الله
حفظتي كل شعره من كثر ما انتي تحبينه
يا أم الخير مامثلك مثيل ولا أظن أشباه
عزيزه دار عز ومن نوى عزك تعزينه
فقير الجاه لامن صار وسطك صار عنده جاه
وفقير المال لامن قاربك والله التغنينه
أنا يامحبوبة من حشمة ترابك ما أحب آطاه
أحسه طاهر والطاهر إلى من دسته تهينه
أنا توي دريت إن المفارق كايده بلواه
وعرفت ان المفارق يتعذر لا دمعت عينه
